Philippians 4

kawer-ímáyááwé suꞋmai úmae íyóro-kwasai.

1kesí kwaásiyono. kentí imáyáa kwéunda-kwaasiyomban-owe. Áánútun-aai kosimátímakaundarakemba ÁánútunopaꞋa tiráantavena sirunkó kaweꞋá kwéisaꞋa kotuwánanae séꞋa kwéune. Ísóigoe tarúmaimo máyáamba asiramái máéro.

2kemá Póro kaer-ínínkáí túwíꞋa Yótiyaawe Síntikite asiramái simátimeꞋa séꞋa Ísóigontavekai imáyáa ékai aaisan-áímbá ivátuwekai mimbórá-ímáyáá okaiyó kwésune. 3kesémo mimbórá-máyáímó kwémayaandawai simáménda isaaó. minkáér-ínínkórásáráí áséi-kwasaiyavesarai súwaꞋnaa urááyamba po minínínkáí túwaꞋnaa inasaráí aaisan-áímbá ivátuwesarai mimbórá-ímáyáá okaiyó kwésune. minínínkáíyé moóráwai áwíꞋa Kérémentiye évakarawaiye áséi-kwasaiyavesa kesé asirayám-báyáí kwémaesa aúnáiꞋa umái maíꞋmaiꞋa ónááowai miwí túwíꞋa Áánútu kwená aúváí-kwandaaivimba agaimakáiye.

4Ísóigoe tarúmaimo máyáamba aasiyaasí tirunkó aamoí íno. ókwaraꞋa mináímbá séꞋa tirunkó aamoí íno kwésune. 5paru umái méꞋa túwaꞋnaa íyamba amáparawai tuwánanaaowe. Ísóigo sáwíyankaꞋa marapáꞋá kumíníye. 6amápa-tantaataveꞋa íma anón-imayaa éꞋa ÁánútumpaꞋa áísaa eꞋa námúnaa séꞋa súwi seró. 7mirámó íyanamo éna Áánútu paru umátinkaniye. Áánútuna parugómá amápa-parugomba usáyaaitaraiye. Ísu Káráísitiye tarúmaimo máyáamba mimpárúgó tirumpiné imáyáarare kárákwiyiniye.

8kesí kwaásiyono. senda-áímbá ísáaro. árair-aine aiva-tántááré arupí-yantaare kaweré suꞋmai ií-yántááré aamoí kwéon-tantaare kasenku-yántááré kawer-áímbó kwésen-tantaare áwíꞋo mósá kwémaraan-tantaare miráumai-yantaataveꞋa imáyáa úmae íyóro. 9simátímakaunda-aimba kwéiseꞋa tátoꞋmai kaweꞋá úmae íyóro. mayáímó mairáunda suwánaraavo mirá úmae íyóro. mirámó íyanamo éna Áánútu paru umátinkena keinárawate méniye.

súwaꞋnaa owe séna Póro súwi siráin-kwasai.

10ááéma kentávéꞋa imáyáa uráamba súwaꞋnaa ónááon-amba íma kwaémáímbanivo ívéꞋa kwésuwaꞋnaa-on-amba kwáyáísaꞋa kwésuwaꞋnaa-owana sirunkó aamoí kwéisaꞋa ÍsóigompaꞋa súwi kwésune. 11ímo makáunda-yantaatavena íma sirunkó sáwíꞋa kwéiye. sáwíva-tantaaꞋo makáunda-tawai kanaawé séꞋa sáwíva-tantaaꞋo ímo makáunda-tawai úwoi kanaán-iye kwésune. 12ímo makáunda-yantaakona aambá áꞋa awánéꞋa makáunda-yantaakona aambá áꞋa awánéꞋa kwéunana Áánútu imáyáa símísana sirunkó kaweꞋá kwéisaꞋa máyaumne. amápa-tantaaꞋa kesópaꞋa tiráimba évaka-tawai toómbá maréꞋa évaka-tawai kánoꞋa maéꞋa évaka-tawai sáwíva-tantaaꞋa maréꞋa évaka-tawai íma sáwíva-tantaaꞋa maréꞋa miráumai méꞋa kanaán-iye séꞋa máyaumne. 13Ísu Káráísiti asirayámbá símakaisaꞋa amápa-tantaaꞋo kesópaꞋo tiráimba asirayánkwáráꞋá tokéꞋa máyaumne. 14ánivo umbai-yántááꞋó kesópaꞋo tiráimba keinárawaꞋa súwaꞋnaa uráamba kaweꞋá uráawe.

15aivaꞋá áséi-kwasai kosimátímaꞋmaeꞋa kwéiyeꞋa kentí maramá Másétóniyaa-marama tuwéꞋa óꞋon-oꞋom-baravaꞋa kosimátímaꞋmaeꞋa kwénaaunda-kanaavimba keinárawaꞋa Vírípai-naopaken-kwaasiye suꞋmai kwésuwaꞋnaa-eꞋa évaka-tantaaꞋa násímakaawe. Áánútuna kwaási óꞋon-daopimpakewai íma násímún-aimba ísaraawe. 16Tésárónaikaa-naopaꞋa komáyaawanda-kanaavimba évaka-tawai keinárawapinkemba évakarawai timéꞋa tiꞋmárówasa mánásímakaawe. 17nááwiya mánásimenaao-imayaa íma kwéunda póꞋa násimiyawai Áánútu kaweꞋ-méyámbá timínda-meyanko iyíníye-imayaa kwéune. 18Épavarotaitasimba améꞋa aiꞋmárówana másímakain-tantaaꞋa arááꞋa makáumne. másímakain-tantaaꞋa Áánútumba ámakaamba áséi-kwiyumba iséna aamoí kwéin-tantaakaamba makáumne. 19Ísu Káráísitiye tarúmaimo máyáantavena kesí Áánútu amápa-tantaakona ááimba póna keinárawatavena kwembó arááímo tain-tántááꞋá timíníye. 20Áánútu kentáásivowa kwená óꞋoran-aaimba kwaíkwaiꞋa ínímba árair-aimban-iye.

21Áánútuna kwaási Ísu Káráísitiye tarúmaimo máyáan-kwaasiyaveꞋa séꞋa kaweꞋá umái máéro kwésune. Áánútuna kwaási kesé máyáan-kwaasi keinárawatavesa sésa kaweꞋá umái máéro kwésewe. 22Áánútuna kwaási Árómáa-naopaꞋa máyáawaiye Árómáani-kamaani anóndakona kwaásiti mayáí kwémayaawai keinárawatavesa sésa kaweꞋá umái máéro kwésewe.

Ísóigo Ísu Káráísiti keinárawate ména úwoi kwétuwaꞋnaa-intaveꞋa námúnaa kwésune.

kemá Póro súnda-aimba ánásaiye.

23